Ghulja Pajiesining 10 Yiliqini Xatirilesh we Kosrap Qirghinchiliqigha Naraziliq Qilish Yüzisidin İstanbuldiki Xitay Konsulxanisi Aldida Namayish Ötküzüldi

  Türkiyediki Sherqiy Türkistan maarip we hemkarliq jemiyiti, Sherqiy Türkistan medeniyet we hemkarliq jemiyiti we Sherqiy Türkistan yashlar medeniyet jemiyiti birlikte Ghulja pajiesining 10 yilliqini xatirilesh we Kosrap qetliamini eyiplesh yüzisidin 2-ayning 4-küni İstanbul waqti 12:00 din 13:00 giche İstanbuldiki xitay bash konsulxanisi aldida naraziliq namayishi ötküzdi.

  Sherqiy Türkistan maarip we hemkarliq jemiyiti, Sherqiy Türkistan yashlar medeniyet jemiyiti, Sherqiy Türkistan medeniyet we hemkarliq jemiyiti qatarliq teshkilatlarning orunlashturushi bilen Sherqiy Türkistanliq köchmenler 2-ayning 4-küni etigende Sherqiy Türkistan maarip we hemkarliq jemiyitige jem bolup andin aptuwuzda İstanbul (dengiz) boghizidiki Sariyer mehellisige jaylashqan xitay konsulxanisi aldigha bérip naraziliq namayishi ötküzdi.

Namayishchilar qollirida Sherqiy Türkistan we Türkiyening bayraqlirini igiz kötürüshüp, xitay tajawuzchilirining Sherqiy Türkistan'gha qilghan tajawuzchiliq, irqiy qirghinchiliq we terrorluq jinayetlirige qattiq naraziliq bildürdi we ularni eyiplidi.Namayishchilar "Tajawuzchı xıtaylar, Sherqıy Türkistandin yoqal!","Térrorchi qizil xitay, Sherqiy Türkistandin yoqal!","Türkistan Türkning yurtidur!" qatarliq shoarlarni jarangliq awazda towlashti, hemme birdek "Allahu Ekber!"-dep ünlük tekbir éytishti.

  Türkistan tenheriket birleshmisi mes'uli, Sherqiy Türkistan medeniyet we hemkarliq jemiyiti teripidin neshir qilinidighan "Kök Bayraq" jornilining İstanbuldiki wakaletchisi Mehmet Dönmez xitay konsulxanisi aldida 1997-yili xitay tajawuzchiliri Ghulja shehride élip barghan qanliq qirghinchiliq, bu yil 5-yanwar küni Qeshqerning Kosrap yézisida élip barghan wehshi qirghinchiliq jinayiti, 1990-yili 5-aprél Barinda élip barghan qanliq qirghinchiliqi we Sherqiy Türkistanda ötküziwatqan türlük jinayetlirini pash qilip bayanat élan qildi.

  Mehmet Dönmez ependi élan qilghan bayanatta xitayning 56 yildin béri Sherqiy Türkistanda ötküziwatqan jinayetliri pash qilindi we eyiplendi.

 Xitay tajawuzchilirining İstanbuldiki bash konsulxanisining xitaylarning niyitige oxshash qapqara derwazisi.

  Namayish tamamlan'ghandin kéyin namayishchilar Sherqiy Türkistan maarip we hemkarliq jemiyitige jem boldi. Jemiyet rehberliri we diniy ölimalar axshamghiche Sherqiy Türkistan we Sherqiy Türkistan xelqini tajawuzchilardin azad qilish yolida shéhid qilin'ghan mujahidlarning rohigha atap toluq xetme qur'an qildi. 20-esirde wetinimiz we millitimizning béshigha kelgen éghir künler we ejdatlirimizning qara niyet tajawuzchilargha qarshi élip barghan jihadliri, eslep ötüldi. Ana wetinimiz we mezlum xelqimizni azad qilish üchün izdinish, yaramliq ewladlarni terbiyilep chiqish heqqide söbet ötküzüldi.

Qaraxan

2007-yili 2-ayning 5-küni

www.turkistanim.org

E-Mail: uyghur@turkistanim.org