3 ـ Qétimliq Dunya Yétim Balilar Uchrishish Merikisi

Istanbulda Ötküzüldi

 

"Türkiye insaniy yardem wexpisi" ning teshkillishi bilen "Istanbul körgezme we yıghın merkizi" de 2007 ـ yili 6 ـ ayning 17 ـ küni "Dunya yétim balilar uchrishish paaliyiti" ötküzuldi.

 Yétim balilarning uchrishish paaliyiti 17-iyun istanbul waqti saet 14:30 da bashlinip, 18:00 giche dawam qildi. Hilal téléwiziye, dost téléwiziye, kiral téléwiziye, eljezire téléwiziyesi qatarliq bir qanche téliwiziye qanili sun'i hemra arqiliq neq meydanni bashtin axir mas qedemde xewer qildi.

 Bu paaliyetke Filippin,Tayland, Hindonoziye, Burkina, Fasu, Chéchenistan, Ityopiye, Pelestin, Iraq, Kambodja, Kosowa, Liwan,Pakistan, Sherqiy Türkistan, Afghanistan,Bén'gal, Bosniye, Türkiye, Iordaniye qatarliq 17 döletning yétim balilar wekilliri, xeyri saxawet teshkilatlirining mes'ulliri qatnashti. Bu yighin'gha azad Keshmirning bash ministirimu xizmitining aldirashliqigha qarimay alahide qedem teshrip qildi we qisqiche söz qilip urush, zulum, tebii apetlerde ata-aniliridin ayrilghan balilarghe ige bolush- jimi musulmanning bash tartip bolmaydighan burchi ikenlikini tekitlep ötti.

  Istanbuldiki Sherqiy Türkistan maarip we hemkarliq jem'iyiti Rahile, Aygüzel, Qelbinur qatarliq Sherqiy Türkistanliq balilar wekillirini bu merikige teshkillidi. Her qaysi dölettin kelgen balilar wekilliri özlirining milli ـ örp-aditini ipadileydighan kiyim ـ kichekliri bilen her xil mezmunda, naxsha oqudi, shé'ir diklimatsiye qildi, Allahqa hemdu sanalar, Muhemmed eleyhissalamgha medhiyiler oqudi. Öz kechürmishlirini, millitining, xelqining, wetinining derd- elemlirini, ahu-zarliniri,tajawuzchiliq we zulumning achchighini yighin ishtirakchilirigha we sun'i hemra téléwiziyisi qatarliq zamaniwi teshwiqat wastiliri arqiliq dunya jamaitige anglatti.

  17dölettin istanbulgha jem bolghan yétim balilar wekillirining jarangliq sadaliridin tesirlen'gen nurghun yighin ishtirakchiliri köz yéshi qilishti. Bolupmu Pelestin, Chéchenistan, Iraq we Sherqiy türkistandin kelgen ösmür wekillerning sehnide iz'har qilghan yürek sadaliri 10 ming kishi jem bolghan yighin merkizini zilzilige saldi, güldüras alqish sadaliri zalni bir alghan idi. Türkiyening Istanbul, Qeyséri, Konya sheherliridin kélip qatnashqan Sherqiy Türkistanliq100 ge yéqin Uyghur, Qazaq köchmenler we dunyaning herqaysi jayliridin kelgen wekiller ay-yultuzluq kök bayraqni igiz kötürüshüp Sherqiy Türkistan wekillirini bashtin- axir qollidi.

 

Komunist xitay tajawuzchilirining zulmi, fashist xitayning pilanliq tughut siyasiti niqabi astidiki irqiy qirghinchiliqigha bolghan ghezep-nepretni eks ettürgen shéir Uyghur qizlarning jarangliq tili bilen Türkche déklimatsiye qilinip yighin ehli gah alqishlisa, gah xitaygha, tajawuzchi zalimlargha bolghan ghezeptin jimjitliq höküm sürdi, minglighan anilar közlirige yash aldi we yighin axirida beziliri sehnige chiqip Uyghur qizlarni baghrigha bésip xatire süretke chüshüshti, Sherqiy Türkistan'gha musteqilliq, Sherqiy Türkistan xelqige azatliq we erkinlik tilidi. Ularning ichide Uyghur, Qazaq, Türktin bashqa Erep, Paris,Chéchen, Boshnaq,Malay, Négir ayallarmu bar idi.