Exletke Tashlan’ghan Bayraq
 

  2007-yili Mart éyida Amerikida dunya Uyghur xanimlirining yighini échildi. Anglishimche yighinda biraz ajayipliq bar. Yighin’gha Sherqiy Türkistanning ay-yultuzluq kök bayriqi ésilmighan, bu bir. Ikkinchisi, musteqilliqtin söz échilmighan.

 

   Xatire resimge chüshüsh waqtida bir kichik Uyghur bala qolida ay-yultuzluq kök bayraqni kötürüp resim aparatining aldigha kelgen, emma u yighinning teshkilligüchisi (Rabiyemge rehberlik qilip yénida yéqin turghan Amerikiliq xanim) kichik balining qolidiki bayraqni tartip élip exlet sanduqigha tashliwetken.

1.  Pütün dunya döletlirining dölet bayraqliri özliri üchün qanchilik qedirlik, qimmetlik, muhim bolghan bolsa, biz 30 milyon Sherqiy Türkistanliqning bayriqimu özimiz üchün, dölitimiz üchün shunchilik qedirlik, qimmetlik we muhim.Uning üstige isan digen qolidin chiqirip qoyghan, yaki arzulap qolgha keltürelmigen nersisining qimmitini téximu obdan bilidiken. Eghir zulum, éghir bésim astidiki herbir dertmen Uyghurning chekken otluq ahliri, tökülgen her tamche issiq qanliri, kirishken chishliri, tügülgen mushtliri arisida ay-yultuzluq kök bayraqning hesriti bar...

2.  Exletke tashlan’ghan u bayraq- méning yürigim, 30 milyon Sherqiy Türkistanliqning yürigi, xan tengrining qarliq choqqisida körüshke teshna bolghan tilikimiz...ejdatlirimizdin bizge qalghan eng qimmetlik miras, ewladlirimizgha béridighan bibaha göher amanitimizdur.

3.      U bayraq 30 milyon Sherqiy Türkistanliqning ghururi.

4.      Bu ay-yultuzluq kök bayraq üchün shéhid bolghanlarning söngekliri jem bolsa idi, Tengri téghidin büyük tagh bolatti. Bu bayraq üchün shéhid bolghanlarni istatistika qilsaq top-toghra bu san Jénis kitabigha kiretti.

5.      Bu bayraqni siz Sherqiy Türkistan’gha bérip tirniqingizgha yaki tirnaqchilik qeghezge sizip körüng, xitay tajawuzchiliri sizni tutup derhal öltüridu, hetta jeddi-jemetingiz bilen qoshup.

6.      Bu bayraq 30 milyon Sherqiy Türkistan xelqining chüshliride körüp közige sürtüp baghrigha basqan qimmetlik méli, bayliqi, ashiqi, xumari, derdining dawasi.

7.      Bu bayraq xitay zalimlirining közige qadalghan mix, béshigha köktin yaghqan oq yamghuri, basqan yéridiki mina. Bu bayraqning étini anglighan xitay tajawuzchiliri qorqqinidin aghzigha uchuq chiqip kétidu....

8.      Uyghurlarning bügünki rehbiri Rabiye xanimni Amerika hökümiti jümlidin Kondirisa Rais xanim nurghun japalar chékip xitayning zey zindanidin qutquzup élip chiqti. Yüzming rehmet éytsaq az. 30 milyon Sherqiy Türkistanliq ichide "yashisun Amerika"- dep towlaymiz, chünki, wetendikiler ashkara towliyalmaydu, qarangghu bulunglarda pichirliship, köz yash töküp Amerikigha bolghan minnetdarliqini bir-birige yoshurun iz’har qilishidu.

 

  Hörmetlik Amerika pirizdénti Bush Rabiye xanim bilen bu yil körüshti. 30 milyon Sherqiy Türkistanliqning memnuniyet köz yéshi aqti. Pütün dunya xitaydin qorqup yaki xitaygha aldinip Uyghurlarni “yétim bala” qilip chetke qéqip turghan bir peytte, Bush ependi küchlük qolini Rabiye xanimgha uzatti. Uyghurlar xitaydin qorqmaydighan, batur insanlarning barliqini kördi. Teklimakanning qaxshal derexlirige su yügürdi.

Uyghru xelqining:

 

“Quruq qaxshal bolup qalduq,

Otunchi apirip satsun.

Xéridari kélip qalsa,

Gherp bichare,-dep satsun.

 

Ejep bir zaman boldi,

Alem chörgiley deydu.

Yürektiki zerdap sular,

Qan’gha öriley deydu.”

    -          digen naxshilirining ornini:

-   “Béghing’gha kirgen bilen,

        Bir gülüngni üzmidim.

    Sen ümidni üzgen bilen,

    Men ümidni üzmidim.”

- digen naxshilar aldi.

 

   Bayraqni exletke atqan xanim Amerikining wekili emestu. Eger Amerika hökümitining wekili bolghan bolsa qilghan ishidin qandaq mena chiqirishimiz kérek?

Birsi manga chüshendürsun. Yaki u xanimgha xitay öz tesirini körsettimu qandaq?

  Sherqiy Türkistanliq xelqining kök bayriqini kötürishini, musteqil bolushini Amerika xalimamdu? Eger xalimisa nime üchün Rabiye xanimni zindandin chiqirip Amerikigha ekeldi? Xitay bilen yarashturup qoyush üchün ekeldimu? Biz chet’ellerde sergerdan bolup yürgen Uyghurlar weten üchün wetensiz yürmektimiz. Wetenni musteqil qilish, xitaylarni qoghlap chiqirish, ularni seddichin sépili ichige qoghlap kirgüziwétish üchün yürikimizge tash bésip kéchini kündüzge ulimaqtimiz.

 

  Ne qilich, ne medal-altunlar boynimizni qan icher düshminimiz xitaygha egdürelmeydu. Wetenning musteqilliqidin bashqa közligen héchqandaq menpeetimiz yoqtur, bizning!

 

  Yawropa, Amerika yardem bérip, tarixtin buyan héchqachan musteqil döliti bolup baqmighan Kürtlerge Kürdistan qurup bermekte.

Türkiyening Kürtlerge mektep, radio, téléviziye istansisi qatarliqlarni qurup bérishini telep qilmaqta.

Emma, Uyghurning mekteplirini taqawatqan xitaylargha héchkim “Toxta!”- dimeydighu!?

  Dunyaning adalitini, insan heqlirini qoghdighuchiliri xitaydin qorqamdu qandaq? Yaki xitaygha sétilghanmidu? Nimishqa Kiristin Teylirdek oghlanlardin nurghuni chiqip xitayning heqiqi yüzini dunyagha körsetmeydu? Nimishke nesli qurup ketish aldidiki haywanatlargha(tash paqa, müshük éyiq, yawa töge..) körsitilgen étibar Uyghurlargha körsitilmeydu?

 

  Bichare Uyghur millitidin chiqqan musteqilchilarni “démokratiyechi bol!, Xitaygha boynungni eg!)-dimek insanliqqa yarishamdu? Qoyup béring! Qararni Sherqiy Türkistanliqlar chiqarsun! “Tütünning achchighini mora bilidu”, insani yardem bérishni könglige pükken adil insanlar, dunya xelqi, ularning musteqilliqini qolgha keltürüshige yardem bersun. Biz ularning bergen yardimini jezmen qayturimiz.

9.      Exletke tashlan’ghan bayraqning igisi 30 milyon Sherqiy Türkistanliq namidin u bayraq üchün shéhid bolghan milyonlighan shéhidler namidin bayraqni exletke atqan xanimni eyiplaymen, Amerika sot mehkimisige dawa qilimen. Maddiy we meniwi jehette jazalashni telep qilimen.U xanimgha lenet oquymen.

10. Bayriqimizni exletler arisidin élip bizge ikki qollap tapshurushini telep qilimen.

Pütün Sherqiy Türkistan xelqidin özür tilishini telep qilimen.

 

   Hörmet Bilen:

 

Aptori: Tetqiqatchi:Zeynure Öztürk

2007-Yili 10-Ayning 21-Küni, Istanbul